" بيـــــــاض الثلج ومسلسل المخالفات "

["بيـــــــــــاض الثلج"]

السلام عليكم




صباحكم ورد يا حبايب ألبي


ندخل في الموضوع



أنا انسانه أحب النظام << واضح

بس حظي سيء مع النظام دااااااااااايم ألقى نفسي مخالفة غصباً عني

والسبب في مخالفاتي هو تهوري الدائم .. يعني اتهور في الوقت الغلط<<حظي سيء

ومسلسل التهور و المخالفات ابتدا معي من يوم مافتحت عيني على الدنيا

حيث ان الوالده حفظها الله تقول انتي من بين أخوانك ولدتك في البيت لأنك داهمتيني مداهمة ما أعطيتيني فرصة أروح المستشفى

وبعدها تقول اني مشيت وعمري تسعة شهور فقط << ياسعني

وبعدين جا وقت دخولي المدرسة .. الله ياهذاك اليوم اتذكره كأنه أمس

بنات سنه أولى كلهم يبكون يبغون امهاتهم يقعدون معاهم

وأنا ابكي ابغى امي تروح البيت وتخليني لحالي<<من جد تخلف

وبعدين جت المتوسط وما أدراك مالمتوسط <<أيام المراهقة

أتذكر اني لما دخلت المتوسط أمي قصتلي قصتي .. وانا اللي افكها في المدرسه

والمديره امتحنتني كل ماشافتني في الطابور تجيني وتعطيني بنسه تقول لمي قصتك يا بنتي عن عيونك

وانا المها في الطابور وإذا دخلت الفصل أفكها<< ياحليلي

وهكذا حتى جا هذاك اليوم وهزأتني المديرة قدام الله وخلقه وبغت تقصها لي .. بعدين توبت لا أنزل قصتي .. ورفعتها لين يومكم ذا<< ارت يالخوف

وبعدين جت الثانوية .. الله على هذيك الأيام

عاد هذيك أيام الضحك اللي على أصوله<<تذكرين يا سلوفه

كنا أنا وسُـــلاف قاعدين جنب بعض في الفصل وهاتك ياضحك عالفاضي والمليان

أتذكر مره في حصة الرياضيات << الله يا أبلة عواطف

كنا قاعدين أنا وسُــــلاف نسطر دفاترنا .. وفجأة انتبهنا الا والمسطره فيها مرايه

ونطالع لأشكالنا في المراية ونضحك على بعض

شوي إلا وابلة عواطف على روسنا واقفه

تقول اوقفو يا ثنتين .. ووقفنا .. قالت يالله قولولي وش اللي يضحكم

أنا ماقدرت اتكلم بس قعدت اضحك

وسُــــلاف تدقني تقول اسكتي وهي تضحك أكثر مني

المهم خلتنا واقفين شوي وجلستنا .. عشان كنا شطار عندها في الرياضيات

مع ان الموقف ما يضحك بس أيامها كانت قلوبنا فاضيه وأي شي يبسطها .. الله على ايام زمان<< يا هالعجوز


ولما دخلت الجامعه كان المفروض مسلسل المخالفات ينتهي بحكم اني بصير مربية أجيال قديرة << الله يخلف عالأجيال اللي بربيها:d


طبعاً الجامعه عندنا فيها قوانين كثييييييييره وأكثرها ما لأمها داعي

بس يبغون يسوون فيها جامعه ويعنن عندنا قوانين

وضابطات الأمن هم المسؤوولات عن مراقبة قوانين الجامعه

المهم هذاك اليوم كنت مبسوووووووووووطه عالآخر

وانا لما اكون مبسوطه أحب ألبس أورنج <<لوني المفضل

وقمت ولبست بلوزه أورنج .. وشنطه أورنج وحركاااااااااااات

مبسوطه بنفسي مرررررررررررررره

ولما دخلت من البوابه نادتني ضابطة الأمن .. طبعاً ضابطات الأمن عندنا طولهم ميه وتسعين وعرضهم تسعين

أنا أسميهم السجانات خخخخخخخخخخخخ<<الله لو يدرون عني

المهم انها نادتني

تعالي يابنتي

وانا اللي اتلفت حولي الا بنت الذين تقصدني أنا

وأنا اللي أأشر على نفسي .. يعني تناديني !!

قالت إيه انتي .. هو فيه غيرك مخالف

وجيت عندها وانا كلي ذهووووووووووووووول

ليه مخالفة ؟؟!!

قالت اسمك ايش ؟؟ وطلعت سجل المخالفات

السجل أطول مني

قلت ليه ؟!

قالت انتي مخالفه

طالعت في نفسي والا انا مو مخالفه

قلت ماني مخالفه

قالت إلا .. ليه ماتدرين ان البلوزه الحمرا ممنوعه

قلت أدري

بس انا لا بسه بلوزه أورنج مو حمرا<<صدق حولا

قالت بالله أورنج

قلت اي والله أورنج

قالت متأكدة انها أورنج

قلت ايه متأكدة

قالت طيب حتى الأورنج ممنوع وضحكت

وبغت تطيح على خويتها وهي تضحك<<طاحت عليها طوفه ان شا الله

عاد انا اتحطمت ساعتها

قلت والله توني ادري ان الأورنج ممنوع

خبري به مسموح

قالت ايه بس منعناه لأن بعض البنات صارو يجيبون بلايز نحتار هي احمر والا أورنج << احتارو فيك وين يدفنونك يارب

قلت طيب إذا إحنا بنوتات في عمر الزهور مانلبس أحمر وأورنج من يلبس بالله !!


قالت البسو في بيوت أهاليكم يا قلبي << وعععععععععععع والله لو اني قلبك لوقف خخخخخخ

ويالله بلا كثرة حكي ووقعي مخالفة << عقبال مايوقعون شهادة وفاتها يارب



وفي يوم ثاني نمت قبل الدوام بساعه وحده وصحيت متأخر ومن العجلة نسيت محفظتي وفيها بطاقتي الجامعية .. وطبعاً ممنوع ندخل بدون بطاقة

و لو أحلف بجدتي مايصدقون اني طالبة جامعة الا بالبطاقة

المهم ولما وصلت إلا واتذكر اني نسيتها .. وش هالمصيبه وانا عندي إختبار ومحاضرات مهمه هذاك اليوم

دقيت على وحده من زميلاتي أخبرها صحبه مع السجانات يؤ يؤ أقصد مع ضابطات الأمن

وقلت لها اني نسيت البطاقة وش اسوي !!

قالت شوفي أنا دايم لما أنسى البطاقة أقرأ الآيه اللي تقول

" وجعلنا من بين أيديهم سداً ومن خلفهم سداً فأغشيناهم فهم لا يبصرون "

وامسح بها على نفسي وادخل ومايشوفوني<< يمااااااااااه سحر

وكمان ادخلي وانتي واااااااااااااااثقه من نفسك مو تقعدين تتلفتين وتفضحين عمرك


قلت طيب خلاص مع السلامه

والله وجمعت كفوفي وقعدت أقرا الآيه فيها وبعدين مسحت بها على راسي وجسمي<< كريم صارت مو آيه

والتفت الا والكل يطالع فيني .. وش هالأندونيسية جايه تتمسح عندنا خخخخخخخخخخخخخخ

الأندونيسيين حقين أذكار .. الله المستعان بس

المهم واستجمعت قواي وجيت بدخل وما اطالع فيهم

إلا ووحده منهم تناديني

اسسسسسسسسسسسسسسسسسسسستغفر الله العظيم:busted_red:

ارتفع ضغطي ألف يو نادتني

واجي الا وهي ماتقصدني

كانت تقصد وحده دخلت قدامي

يالله يالحظ

صدق المثل اللي قال اللي ماعنده حظ لا يتعب ولا يشقى

ووقعت مخالفة طبعاً

ودخلت الجامعه بس ادور على صديقتي ابتهاوش معها وافش غلي فيها << شاطره على الضعاف



أظن كذا كفايه عليكم :d



اشوفكم قريب ان شا الله

واستروا ما واجهتوا يا أحلى أعضاء في الدنيا


:fish:<<حلوه السباحه في الهوا :d





"بيــــــــــــــــــــــاض الثلج"

[ماريس الحب]

ههههههههههههههههههههههههههههههههه ههههههههههههههههههههههههههههههههه ههههههههههههههههههههههههههههههههه
الله يرجك متى بنخلص من خبالك وجنانك جننتينا معك

تصدقين بالله ذكرتيني بنفسي وبجناني
بس والله صدقتي ع السجنات قصدي حارسات الامن

وذكرتيني بموقف صار معي معاهم
بقوله لكم باختصاااااااااااار

في يوم من الايام تواعدت مع الشله المهستره
نخلي هاليوم فله وهستره
وممنوع حضووووووور المحاضرات
واتفقنا اللي تجيب قهوى وحلويات
وفطووووووور<<<<<<<مساكين اهالينا مايفطرونا في البيت
المهم تاخرت شوي ع الكليه عشان الحارسات مايكونوا فيه
وحاطه ثلاجات القهوه بشنطه ياكبرها اللي يشوفني حجه شايلها بقشتها<<<<<:d
وادخل واقرأ الايه اللي ذكرتيها
وامشي بكل ثقه وبسرعه
والا حارسة الامن تناديني
يـــــــــــــابنت............
انتبهت للشنطه....
الا احط رجلي وامشي بسرعه وهي تنادي يابنت ويابنت
وماتشوووووووف الاغباري من سرررررعتي<<<<حشى راكبه دباب:hah:
وماكان يمديها تتحرك وتلحقني
وشربنا القهوى وكانت احلى جلسه
ههههههههههههههههههههههههههههههههه
اسمحولي ع الاطاله بس حبيت اشارك حبيتي المجنونه بيوووووض ايام الجنان...

[Lumière de vie]

ههههههههههههههههههههه

الله يرجك بيـــــــــاض الحين انتي تحبين النظــــــــام

بس شوفي لما الواحد مايشي على حسب النظام يحسه سوا شي

يعني خالف تعرف

هذي حركاتنا بالمتوسط خصوصا ذكرتيني

بالعطورات والكاسيتات لراشد الماجد .. والصور

والشعر وموديل المريول

حركاااااااااااااات

تسلمين على سوالفك الحلوه مثلي

لاتحرمينا من كذبك وطلتك

خخخخخخخخخخخخخخخخ

[احساس ميت]

وهكذا حتى جا هذاك اليوم وهزأتني المديرة قدام الله وخلقه وبغت تقصها لي .. بعدين توبت لا أنزل قصتي .. ورفعتها لين يومكم ذا<< ارت يالخوف

بياض الثلج :54:
والله من كل قلبي ضحكت:hysterical:
والله تنفعي تصير كتابة مسلسلات :read:
طاش ما طاش
هههههههههههههههههههههه:00020:

الله يحفطك يارب
مشكورا اختي

[dodo]

حيث ان الوالده حفظها الله تقول انتي من بين أخوانك ولدتك في البيت لأنك داهمتيني مداهمة ما أعطيتيني فرصة أروح المستشفى



ههههههههههههههههههههههههه هذا لوحدها :hah: ..


بياض أجل لو تسوقين وش بتسوين .. ؟ :doh:


مشكورة يا بعدي على المواقف الي تدل على نظامك .. >> أمحق نظامـ ..

[سُــــــــــلاف]

ههههههههههههههههه

الله يرجك ... ذكرتيني بأيــام زمااان هههههه

<< ماتت من الضحك

بس نسيتي تقولي مخالفتك في الثانوي .. يوم المديره هاوشتك على المريول يوم تقول

لك كاروهات ههههه

عاد كله كوم وشكلك وانتِ تتهزأي كوم ثاني هههههه:hah::hahah::hah::hahah:

وهالموقف كل ماتذكرته أختي تموت من الضحك ...

وموقف أبله عواطف (أم زكي خخخ) كوم ثاني .. والله إننا مهسترات من جد كأننا ماقد

شفنــا مرايه في حياتنــا كلها:hahah::hahah: ..

أما أنــا أيام الكليه كنت نظاميه وفي يوم خالفت وكانت أختي مضيعه بطاقتي ودخلت

ببطاقتها ( لأنهم مايطالعوا في البطاقه أهم شي شايلتها في يدي خخخخ) .. بس وقعت

مخالفه بإسم أختي خخخخ:hahah:

<< أختها حقدت عليها ذاك اليوم ههههه:helpsmilie:


ومسلسل المخالفات ماينتهي ... لو بأحكي بيخلص الحبــر :d:d:d:d


استعدتـ بعض الذكريـاتـ الجميلهـ هنــا ..


سُـــــــلاف

[لِمَ]

وعليكم السلام ورحمة الله

يـــــــــــــــــــــــــــــــــــــوه يابياضوه

على جذيه بتخليني أشج ( الجربه ) :read:

و ( الجربه ) هذي مملؤة بالذكريات الحلوه :)

نبدأ على طول بالمراحل الدراسية

و نسيب أيام الطفولة البريئة بأحداثها ومغامراتها وذكرايتها و مخالفاتها بقلبي

مـــــرحلة الإبتدائي

بما إني كنت ( دلوعة ) فـللأسف الشديد ماكنت أحب أروح للمدرسة

وأهلي مو راضين عن هالشيء وسوّو المستحيل علشان أروح بس برضو مصره ماروح[فقط الأعضاء المسجلين والمفعلين يمكنهم رؤية الوصلات]

فعلشان كذا بهالمرحلة مافيه أي مخالفات بحسابي , :hahah:


ننتقل للمــــــــــرحلة المتوسطة

وآآآه يهالمرحلة , أروع مرحلة مرت علي بصراحة ,

من مرحلة ( الشبرات ) و ( القوبات ) إلى مرحله ما فيها هذي الحراكات

أزمة المصاحــــــــــف

بنات من إلي ما مرت بهذي الأزمه من خلال مراحل دراستها ؟ :smartass:

مره كنت مسويه شعري مثل الكيرلي , ومتحمسه , إلا وهالمشرفه جاتني وقالت : ليه مسويه كذا ؟؟ لا تسوينه مره ثانيه , لا حوووووووول المشكلة مو أنا لحالي الي مسويه مثل كذا لكن وش نقول حكم القوي على الضعيف .

ومره كنت لا بسة خاتم بمصبعي < أجل وين بكفك > , وصفيت أخر الطابور :smartass: يقالي ماراح تشوفه المشرفة وتاخذه , هه ما دريت إلا بسم الله علي جاتني , وقالت الخاتم لو سمحتي , وخذته ولا شفته بعد كذا , :( ولا السلاسل ولا الشباصات ولا ولا ولا


أما مرحلة الثانوي

همممم , كنا نخالف بصراحه في اللبس بوقت ( الشتاء ) بس , تقولين عرض أزياء
من هالمخالفات لا بالألوان ولا بالموديلات , :hahah: وبوقت الإمتحانات حتى , فرصتنا والله
( نفس ) عن أنفسنا شوي , لا من حلا ولا من قهوة ولا من أدوات مكياج :hahah: ولا من شباصات ملونه , وما ندري إلا ومداهمة جايتنا من قبل الإدارة ومصادرة كل شيء .
كانن مسميني (( الفرنسيه )) علشان لبسي يقالهم من فرنسا .. :hysterical:

أما المرحلة الجامعية

فبصراحة أعترف أنو أنا مو نظاميه في ( بعض ) الأحيان , قبل فتره أتفقت أنا وصديقتي إنا نتقابل في مكان في وقت البريك , وبالفعل رحت للمكان المتفق عليه , وأنتظر وأنتظر وأنتظر يألله وينها , خفت بصراحة , الشاهد ماتقابلنا , بعد مارجعت للبيت وحاكيته , وسألتها , قالت : نعم , أنا هناك بس ماشفتك ؟؟ تعجبت وسميت بسم الله , سألتني قالت وش كنتي لا بسة ؟؟ قلت أبد نفس نظامهم , أسود وأبيض , قالت : أيواا وأنا مركزه على البنات إلي لا بسين ألوان غربيه ولا مشجر بما أنو هذا لبسي دائما :hahah:

الله يوفقنا يارب لما يرضاه ويحبه , ويستر علينا بالدنيا و الأخره إن شاء الله

شكرًا بياض

يعطيك العافية حبيبتي

:bye1: